Sinigang sa agahan, tanghalian at hapunan

Sa isang minuto, isipin mo ang iyong paboritong pagkain. Isipin mo na nasa harap mo ito. Malamang ngayon ay nagugutom ka na, maaari ring ikaw ay natatakam, nangangasim o naglalaway na.  Ngunit maaari naman  na nahirapan ka rin mag-isip kung ano ang iyong paborito sa lahat ng pagkaing gusto mo dahil sa dami dami ng gusto mong pagkain, ay hindi ka makapili ng isa, na siyang matatawag mong “paboritong pagkain”. Bagamat iba’t iba ang ating kagustuhan sa pagkain, magkakasundo tayo sa aking sasabihin na ang pagkain ng favorite food o paboritong pagkain ay may magandang dulot sa bawat isa satin. Ito ay nagtatanggal ng stress, nagtatanggal ng antok, nagsisilbing pampagana sa ating mga katawan, at higit sa lahat, ito ay nagdudulot ng kasiyahan.


Kinailangan kong isa-isahin at ilista bawat isa ang mga gusto kong pagkain bago ako nakapili ng siyang paborito ko sa lahat  -  ang sinigang na baboy. Bagamat nakalakihan ko ang pagkain ng Korean food ay mas nagustuhan ko ang sinigang  na pagkaing Pinoy. Ang nagustuhan ko sa sinigang ay ang maasim na sabaw nito, ito ay matipid, ito ay madaling lutuin, at ito ay naaayon sa panlasang Pilipino dahil sa  ito ay ginagamitan ng  sampalok, kalamansi, at kamatis. Itong mga ito rin ang siyang nagpapaasim sa sinigang. Ang iba pang sangkap nito ay  bawang, bagoong isda, katamtamang  gabi, sitaw, labanos, dahon ng kangkong at siling pari.  Ang sinigang ay karaniwang  mabibili sa mga karinderya.  Ito ay kadalasang makikita sa hapag-kainan ng mga tahanan, ito rin ay ulam sa mga piyesta, salu-salo, at sa mga handaan. Ang pagkain ng sinigang ay maganda sa katawan sapagkat ang kaasiman nito ay nagbibigay ng Vitamin C sa ating katawan, ito ay pampalakas ng resistensiya laban sa sakit dahil sa marami itong sangkap na gulay at ito ay higit na masustansiya dahil sa kumpletong sangkap nito na nagtataglay ng protina, bitamina at carbohydrates. 

Talaga namang ang ulam na ito ay hindi lang masarap kundi masustansiya rin sa katawan. Pakiramdam ko, gumagaan ang pakiramdam ko sa bawat higop ko ng sabaw ng sinigang. Kaya naman ito ay talagang paborito ko sa lahat ng mga pagkaing gusto ko. Kahit pa ito ang maging ulam namin sa agahan, tanghalian at hapunan ay tiyak na hindi pa rin ako magsasawa. Sa sobrang sarap nito ay gusto kong ito ay maging “Pambansang Ulam” nating mga Pilipino. Gayunpaman,  lagi akong umaasa na balang araw ay makakapagluto ako ng sarili kong  special sinigang at maipapatakim ko ito sa aking pamilya, mga kaibigan, at sa aming katulong na nagluluto ng sinigang para sa amin.  Malakas ang tama ko sa sinigang dahil wala itong katulad. Mapa-agahan, tanghalian o hapunan man, hinding hindi ko ito tatanggihan. =)

Je-Min P. Choi