Ang Star ng Aking Pesto =)

     

     Marami akong paboritong pagkain at seasonal ang pagkahilig ko sa pagkain. Kung napagtripan ko ang de-latang tuna, ito ay maari kong makain araw-araw sa loob ng isang linggo; sa susunod na linggo, iba naman. Naalala ko pa na isang beses ay nahilig ako sa nilagang itlog, at araw-araw ko itong kinain. Kapag ako ay sinusumpong ng katakawan, madalas ay nasasabi ko sa aking ina na, “Ma, gusto ko ng ganito, gusto ko ng ganyan.” Kaya madalas niya akong tinatanong na, “Anak, naglilihi ka ba?” Sa kabilang banda naman, kapag kakain kami sa isang restawran kasama ang aking pamilya, ako madalas ang nag-oorder ng pagkain.

     Ang aking paboritong pagkain all-year-round ay pasta, lalong-lalo na pag pesto. Sabi ng karamihan, madali lamang ito lutuin. Ang mga pangunahing sangkap dito ay pasta at pesto; ang iba pang sangkap ay durog na paminta, olive oil, sibuyas, at syempre hindi mawawala ang keso. Pwede rin ito patakan ng dayap upang magbigay kiliti sa ating panlasa. Ang iba pa ay naglalagay pa ng inihaw na manok sa ibabaw na mas nagpapasarap dito. Ito ay nabibilang sa continental foods kaya’t kadalasan ay mabibili ito sa American at European restaurants gaya ng The Old Spaghetti House, Pancake House, at Chaikofi. Ito rin ay mabuti sa kalusugan dahil may sangkap itong olive oil na nakapagpapababa ng kolesterol at nakakatulong upang maiwasan ang sakit sa puso.

     Sa tuwing ako’y makakain ng pesto, nagugunita ko ang mga matatamis na alaala kasama ang aking mga pinakamamahal na kaibigan noong hayskul, dahil sila ang kasama ko noong unang beses kong natikman ito. Habang ninanamnam ang sarap nito, naalala ko kung paano kami magtawanan, magkantyawan, at mag-iyakan. Bagamat kami’y mga kolehiyo na at may kanya-kanya ng landas ng tinatahak sa aming buhay, gumagawa kami ng paraan upang magkita-kita muli, magkamustahan, at sabay-sabay na gunitain ang mga alaala na nakatatak sa aming isip at puso habang kinakain ang aking paboring putahe.

                                                                                        -Adrienne G. Kiong, 1T1