Partacan! Manganin ti makan naggapu kina inang! (Dali! Kumain na ng pagkaing galing kay inay!)

Ang mga Pinoy ay mahilig kumain. Kahit saan ka man tumungo sa Pilipinas ay hindi mawawalan ng karinderya o restawran. Masarap kumain kapag gutom ka, lalo na kapag ito ay libre at mas lalo pa kapag ito ang paborito mong pagkain. Kahit ako man ay hindi sumsunod sa aking diyeta kapag nakikita ko ang aking paboritong pagkain.

“Manganin!” Tawag ng aking ina sa amin na nagsesenyales na kailangan na naming bumba sa hapag-kainan. Masarap ang ulam namin tuwing hapunan dahil ginagawa itong engrande ng nanay ko para sa pagdating ng aking ama galling trabaho. Ito raw ang isa sa mga dahilan kaya umuuwi nang maaga ang aking ama sa gabi. Hinanda ng aking ina ang putaheng paborito ko noong gabing iyon. Lahat na ata ng pagkain ay masarap sa aking panlasa ngunit itong putahe na ito ang pinaka-espesyal sa akin, ang Kare-Kare. Ako ay mahilig rito lalo na kapag may kasama itong bagoong. Ilokano ang aking mga magulang kaya ang bagoong ay naging parte na nang aming pagkain. Natikman ko ito noong niluto ito ng aking ina noong bata pa ako. Noong una, ayaw ko pa tikman dahil nalaman ko na buntot ng baka ang ginagamit rito. Hindi ko akalain na masarap ito at magiging paborito ko pa. Nakaubos ako ng ilang plato ng kanin dahil dito. Masarap ang sarsa nito na may hinalong peanut butter. Nakikita ko ang aking ina na tinutunaw ang peanut butter sa tubig at isasama sa ginisang buntot ng baka at gulay. Ang bango ng amoy ito lalo na nang dinagdagan ng paminta at betsin. Tom Jones talaga ako pag nakikita kong lumalapot ang sarsa habang hinahalo niya ito sa palayok. Hindi nawawala ang kanin kapag kakainin namin ito. Hinahalo ko ang sarsa sa kanin muna saka ito kakainin. Taas noo ako sa Pilipinong nakaimbento ng putaheng ito.

Minsan ay hinahanap-hanap ko ang putahe na ito kapag nakakakita ako ng peanut butter. Naalala ko ang tamang tamis at alat nito. Mahilig din ako sa gulay lalo na ang pechay at sitaw. Napapa-yehey ako kapag nalalaman ko iyon ang aming ulam sa bahay. Umuuwi ako agad sa bahay kapag nalalaman kong iyon ang aming hapunan. Siguro alam niyo na rin ang isa sa mga handa ko sa aking bertday. Sa sobrang hilig ko dito ay tinutulungan ko ang aking ina upang makatikim agad at matutunan itong gawin upang madala ko ito hanggang tumanda na ako at maipagluto ko ang aking mapapangasawa ng paborito kong pagkain na minana ko pa sa aking ina.      

                                                             -Prescilla M. Tempra, 1T1